"Нөхрийг чинь зочид буудалд хүүхэнтэй байсан зураг, видео бичлэг бидэнд байна. Нэг сая төгрөг өгөөд дөрвөн зургийг нь авна уу” гэсэн мессэж хэн нэгний утсанд ирнэ. Уурандаа шатсан эхнэр эр нөхрөө барьж авахын тулд "Хаан” банкны 5034313043 дугаарын данс руу нэг зургийг нь 200 мянгаар үнэлэн авахаар мөнгө шилжүүлчихдэг. Харин тийм зураг огт байдаггүй. Нөхрөө хардсан эмэгтэй жинхэнэ хохирогч болон үлдэж зарим хэсэг нь гэр бүлийн хэрүүл "зарлаж” сэтгэл санаагаар унадаг.
Сүүлийн үед өөрийгөө Ганцэцэг гэж нэрлэх нэгэн 88194014 дугаарын утаснаас ийм төрлийн мессэжийг илгээн, бизнес хийх болсон байна. Хохирогчдоо сонгохдоо мэргэшсэн тэрбээр бусадтай бүлэглэн ажилладагаа ч нуулгүй хэлдэг.
Ямартай ч "Хаан” банкин дахь данс үнэн эсэхийг шалгахад нэлээн хэдэн жилийн өмнө Баянзүрх дүүрэг, Жуковын музейн хажууд байралдаг банкинд залилагч дансаа нээлгэжээ. Тэр ч бүү хэл үргэлж л 50, 100, 200 мянгаар мөнгө орж ирдэгээс үзвэл олон эмэгтэй түүнд хулхидуулсан бололтой.
Тиймээс бусдын сэтгэл санаагаар тоглон, хохирогчоо утсных нь дугаар, ажил мэргэжлээр нь судалдаг залилагчид бүлэглэл болон оршин тогтноод зогсохгүй улам бүр хүрээгээ тэлсээр байна. Бид тэдгээр залилагчдын талаар үргэлжлүүлэн мэдээлэх болно.
Б.Өлзийдэлгэр