Монголчууд бид хэр зэрэг хүний мөстэй, хүн чанартай амьдарч байна вэ? гэдгийг олж мэдэхийн тулд бид нэгэн бүсгүйтэй хамтран бяцхан сорилт хийлээ. Манай гол дүр болсон бүсгүй гудамж талбай, тэр дундаа хүний хөл ихтэй газруудаар явж байгаад ухаан алдан унана. Эхлээд Их дэлгүүрийн урьдуур явж байгаад "ухаан алдаж” унасан. Гэтэл гадныхан очоод гайхаж алмайраад, тусалъя гэх мэтээр хандаж байв. Харин удалгүй нэгэн Монгол эмэгтэй ирээд рашаан авч өглөө.
Дараагийн удаа Урт цагааныг сонголоо. Гэтэл иргэд гайхаж төөрөлдсөн янзтай хандав. Хүүхэдтэй эмэгтэй ирээд –Өө оюутан юм бол аргагүй, хоол ундгүй яваа байх гэсэн утгатай үг хэлээд өнгөрлөө. Сүүлд нь Тэнгис кино театр орчимд сонголоо. Манай бичлэгийн гол дүрийг ухаан алдаж унахад хоёр хамгаалагч очоод бүсгүйн хүйн хонхорхой дээр нь дарж харагдлаа. Нэг залууг сүрхий туслах нь гээд харж байсан чинь гүйж оччихоод гайхаж гайхаж байгаад яваад өгч байна. Харин нэг эмэгтэй ирснээ "Чи бие муутай юм уу, би чамд мөнгө өгье, халуун юм олж уух хэрэгтэй” гэж сэтгэл зовнин хэлж байсан юм.
Монголчуудын мөс чанар, сайхан сэтгэл алдагдаагүй л байгаа юм байна. Манай бичлэгийн анхны дугаарт санамсаргүй орсон хүмүүстээ баярлалаа. Та битгий уурлаарай!
Ж.Батхишиг, А.Мөнхзаяа
