Өнгөрсөн оны хоёрдугаар сард таван настай охины хоолойг хэрчин амийг нь
хөнөөсөн жигшүүрт хэрэг гарч олныг цочирдуулсан. Хуулийн дагуу хэрэг
шийдвэрлэгдсэн ч хэрэгтэн П.Сумъяажав насанд хүрээгүй гэдэг үндэслэлээр
өршөөлийн хуульд хамрагдаад өнөөдөр сул, чөлөөтэй алхаж яваа. Харин
түүнтэй хамт гэмт хэрэг үйлдсэн Д.Бямбадорж өнөөдөр ял эдлэн, хоригдож
байгаа ч түүний өмгөөлөгч түүнийг мөн л өршөөлийн хуульд хамрагдах ёстой
гэсэн байр суурьтай байгаа юм. Тиймээс энэ талаар Д.Бямбадоржийн
өмгөөлөгч Д.Ганбаттай ярилцлаа.
-Шунахайн
сэдэлтэйгээр хүний амь хөнөөсөн гэмт хэрэгтэн өнөөдөр өршөөлийн хуульд
хамрагдаад сул чөлөөтэй явж байна. Үүнд иргэд ихэд шүүмжлэлтэй хандаж
байгаа л даа? -Өршөөлийн хууль бол хэн нэгэн хүнд зориулан
гардаггүй. Тэр тусмаа П.Сумъяажав, Д.Бямбадорж нарт зориулаагүй ээ.
Зөвхөн хуулийн дагуу тодорхой зүйл заалтад хамрагддаг юм. Үүний дагуу
П.Сумъяажав насанд хүрээгүй гэдгээр өршөөгдсөн юм шүү дээ. Гэхдээ би энд
тэрхүү хэргийн талаар ярьмааргүй байна. Нэгэнт мөрдөн байцаалтад буцаад
шилжчихсэн байгаа учраас тэр. Өнөөдөр өмгөөлөгч хүн хуульд заасан үүрэг
даалгаврынхаа дагуу хэнийг ч байсан ялгалгүй өмгөөлөх л үүрэгтэй. Эмч
хүн дайснаа ч эмчлэх үүрэгтэй байдаг шиг. Хүн өнөөдөр алдаж, эндээд
шоронгийн хаалга татсан байж болно. Гэхдээ өршөөлийн хууль гарснаар маш
олон эцэг эх, үр хүүхэд элэг бүтэн болсон. Хуулийг нэг талаас нь хараад
байж болохгүй л дээ. Сайн, сайхан зүйл их бий шүү дээ.
-П.Сумъяажав гэмт хэрэг үйлдэх үедээ 18 нас
хүрээгүй байсан учраас өршөөлд хамрагдсан гэдэг. Харин Д.Бямбадоржын
тухайд? -Миний үйлчлүүлэгч ч мөн адил хэрэг үйлдэх үедээ 18
нас хүрээгүй байсан шүү дээ.
-Тэгээд
яагаад нэгийг нь суллачихсан юм бэ? -Хэрэг үйлдэхдээ хоёулаа
18 хүрээгүй байсан ч шүүхээр хэрэг нь шийдэгдэх үед Д.Бямбадорж насанд
хүрчихсэн юм. Гэхдээ хуульд заасны дагуу 18 хүртэлх насны бүх хүүхэд
өршөөлд хамрагдах ёстой гэж байгаа учраас Д.Бямбадорж ч гэсэн суллагдах
ёстой байсан. Ер нь бол энэ хүүхэд анх удаа ийм хэрэг үйлдсэн. Өөрийн
ухаангүй байхдаа бусдын ятгалгаар алдаа гаргасан. Хэдийгээр хуулийн
дагуу насанд хүрсэн ч гэсэн эцэг эхдээ хүүхэд хэвээрээ л байгаа шүү дээ.
Миний зүгээс хохирогчийн ар гэрийнхэнд хохирлыг нь барагдуулах ажлыг
өөрийн биеэр зохион байгуулсан.
-Хохирлыг
хэдэн удаа барагдуулсан бэ? -Янз бүр л дээ. Миний үйлчлүүлэгч
шүүхээс тогтоосон шийдвэрийн дагуу хохирлоо барагдуулж байгаа. Нэгэнт
өөд болсон охин босоод ирэхгүй учраас амьд байгаа охины эмчилгээний
зардалд жоохон ч гэсэн нэмэр болсон.
-Д.Бямбадорж энэ хэрэгт ямар оролцоотой байсан юм бэ? -Таван
настай охины хоолойг хэрчсэн. Гэхдээ өөрийн ухаангүй байсан гэсэн.
Хөдөөнөөс орж ирээд удаагүй, долоо л хонож байсан юм. Тэгээд
П.Сумъяажавтай нийлээд PC тоглосон байгаа юм. Тэгэхэд цаадах нь мөнгө
олох арга байна гээд дагуулаад хохирогч айл руу очсон. Тэгсэн
П.Сумъяажав охины хоолойг хэрч гэхэд Д.Бямбадорж балмагдаад "Энэ чинь
миний дүүтэй адилхан хүүхэд байна шүү дээ” гэж хэлсэн байгаа юм. Гэвч
цаадах нь шаардсаны үндсэн дээр өөрийн ухаангүй, балмагдсан үедээ энэ
гэмт хэргийг үйлдсэн.
-Хүний
амь хөнөөсөн хэрэгтэнг өршөөлд хамруулна гэдэг нь хуулийн цоорхой юу? -Хуулийн
цоорхой гэж хэлж болохгүй л дээ. Иргэд өршөөлийн хууль гарснаар амьд
явах баталгаа алдагдаж байна гэж ярьдаг. Гэтэл тэр хүмүүсийг
сулласнаараа энэ эрх нь алдагдаад байгаа юм биш. Өнөөдөр Монголд хүний
амьд явах эрхийг алдагдуулж байгаа агаарын бохирдол, хоол хүнсний
хордлого гээд олон асуудал байна шүү дээ. Ганцхан өршөөлийн хуулийг
буруутгаад, хуулийн цоорхой гэж хэлэх нь буруу зүйл юм аа.
-Та Д.Бямбадоржийг өршөөлд хамруулж,
суллахаар ажиллаж байгаа юу? -Хэрэг мөрдөн байцаалтад шилжсэн.
Энэ хугацаанд өмгөөлөгч хүнийхээ үүргийг гүйцэтгэж, ажиллах болно.
Б.Өлзийдэлгэр
|