Японы тулааны урлагийн WVR холбооны төлөөлөгч Мүкай ирэх сарын 22-нд сүмогийн ордонд болох тэмцээнд зодог тайлаад удаагүй байгаа их аварга Асашёорюү баг байгуулан оролцоно гэж мэдэгдлээ. Мүкай наадмын үеэр Монголд ирж, Асашёорюүтэй уулзан, тохиролцоонд хүрсэн гэх ба их аварга ч багаа дэмжихээр Японд очих гэнэ.
Хэрэв тэгвэл Асашёорюү зодог тайлснаасаа хойш анх удаа сүмогийн ордонд очно гэсэн үг юм. Асашёорюүгийн зорилго нь монгол тамирчдаа Японд бэлтгэн, дэлхийд алдартай болгох явдал бөгөөд эхний удаад 2-3 тамирчин явуулах бололтой.
Ямар ч гэсэн наймдугаар сарын тэмцээнд манай тулааны урлагийн од Ж.Нарантунгалаг оролцох гэнэ. Түүнтэй Японы байлдааны самбогийн тамирчин Гооно Акихиро өрсөлдөх юм байна. "Асашёорюү өөрөө тоглох юм биш байгаа гэсэн асуулт их гарч байгаа. Их аварга рингэн дээр гарахгүй. Тэр монгол тамирчдаа дэмжих, туслах зорилготой " гэж Мүкай ярьсан байна.