Хайр гэж сайхныг бэлэглэх атлаа мууг бас дагуулан сэтгэл хоосруулж, зүрх өвтгөдөг байх юм.  Эргэн тойрны хүмүүс хайраас бол баярлаж бас шаналаад л. Шаналалдаа цөхөрч уйлж байгаа харийн бүсгүйг тэврэн аргадах эвээ олохгүй зогсохдоо ганц бие яваа өөрийн амьдралын аз жаргалыг олж харах шиг.

Үнэндээ бүтэлгүй хайртай учирч толгой гудайлган хорвоогийн хамгийн азгүй хүн мэтээр өөрийгөө бодож энэлэн явснаас эрх чөлөөт салхи мэт, хүссэнээ хийж ганцаар явах бас л сайхан жаргал юм.

Худал үнэн нь мэдэгдэхгүй хайр хэмээгчид дөнгөлүүлчихээд хэдэр үгээр биесээ хэмлэн, нулимсыг нь баран явагсад бас л цөөнгүй. Өөрөө хайрлаж чадахгүй, өрөөлд ч бас өгчхөж зүрхлэхгүй харамлаад л тэгсэн атлаа хайр халамж нэхэн, хэнхдэг цээжээ дэлдэн, үгийн мууг хэлчихээд хаалга саван гарч оддог гэх. Арга билэг хослох орчлонд ааш авираар хичнээн удаан амьдарч, хэр их жаргалыг мэдрээ аж. Магад ойртон байсан жаргал хатуу ширүүн авир, хараал ерөөлтэй үгсээс эмээхдээ холдон одчихдог ч байж мэдэх юм.

Жаргалтай, баяр хөөртэй, бие биедээ халамжтай хосыг хараад хэн нэгний хайр халамж, үнэн хайрыг битүүхэн хүсэн болоогүй учралд яарч, цаг хугацааг санаан зоргоор захирмаар санагдана. Гэвч дараагийн хос уйтгар гуниг, хорсол зүхэл, нулимс зовлонгоор амьдарч, баяр баясалаа гээчихсэн явааг хараад энэ чигтээ ганц бие байхыг хүсэн дурлал хайрыг мартагнана.

Уг нь хайр нулимстай бас жаахан зовлонтой байхдаа илүү амттай гэж боддог байлаа гэвч үнэндээ тийм хайр яван явсаар тэвчиж боломгүй ихээр сэтгэлийг зовоон харц нүдний цог залийг бөхөөдөг юм байна. Цөхөрч шаналсан харцанд амьдралын сайн сайхан нь ч зовлон болж харагддаг бололтой.

Хэрүүл, үл ойлголцол дунд өдөр шөнийг өнгөрүүлэх үеийн бүсгүй амьдрах итгэлээ хэдийн алдсан мэт үлгэн салган яваа нь дэндүү харамсалтай. Хайр түүнийг нэгэнт хөглөхөө байсан ч юм шиг магад хөглөх түлхүүр нь түүний гарт ч байж мэдэх юм. Гартаа түлхүүрээ тас атгачхаад сархдаар сэтгэлээ тайтгаруулан суугаа бол бас л харуусалтай.

Өмнө минь намайг ямархан амьдрал хүлээн байгааг мэдэхгүй ч хажууд минь зэрэгцээд зовлон жаргалаа уудлан суугаа тэдний амьдралаас авахаа авч, хаяахаа хаячихаад угтан ирэх хувь заяа чамайг арга эвээр угтан, ханьсах заяатай нэгэнтэй эвлэж амьдрахыг л би хүсч бас хичээнэ.

Зарим нэг нь намайг өрөвдөж ганцаардмал ганц бие залуу гэж шоглон ярина. Гэвч үнэндээ зовлон болсон хуурамч хайраар хань хийж сэтгэлдээ жаргал бус гуниг амтлан гашуун нулимсаа залгин цөхөрч алхсанаас хорвоо ертөнцийг соньхон бүхнийг шохоорхон, сэтгэлийн амгаланг мэдэрч ганц биеэр амьдрах нь дэндүү сайхан.

Хайр бүхэн амьдрал болдоггүй болохоор бүтэх бүтэхгүй дурлал хайранд тэмүүлэн ганц бие амьдралын жаргалтай хормоосоо холдон салах гэж яарах хэрэггүй ээ.

Дэргэдээ байгаа жаргалыг чамлаад тэнд байгаа гялалзсан зүйлд тэмүүлэвч тэнд үнэндээ жаргал байгаа эсэх нь эргэлзээтэй тиймийн учир өнөөдрийн байгаа жаргалдаа сэтгэл хангалуун байх нь хамгийн зөв мэт.